മണി ഇന്‍ കോയിന്‍ ബോക്സ്

"മോമ്മി, ഡാഡി എന്തിനാ മോമ്മി, ഈ രാത്രീല്‌ ഓഫീസില്‌ പോയത്‌" ?

"ഡാഡിക്കേ ഓഫീസിലൊരു എമര്‍ജന്‍സി വന്നുതുകൊണ്ടല്ലേടാ "

"വാട്ട്‌ റ്റൈപ്‌ ഓഫ്‌ എമര്‍ജന്‍സി മോമ്മി" ?

"അതേ 'സീവേജ്‌ ബാക്കപ്പ്‌' ഇഷ്യൂ മോനേ.. എന്റെ മുത്തു സ്മോള്‍ബേബി അല്ലേ, അതൊന്നും മനസ്സിലാവൂല്ലാ ട്ടോ ".

" ഞാന്‍ സ്മോള്‍ ബേബി അല്ലല്ലോ.. ഞാന്‍ 4 ഇയേഴ്സല്ലേ ? ഹാരി മോനല്ലേ സ്മോള്‍ ബേബി ? "

" അതേയ്‌.. ഒരു സിങ്കിലേ... ഇങ്ങനെ നമ്മളു വെള്ളം ഒഴിക്കുമ്പോളേ... അതു പോണില്ലെടാ. ഡേര്‍ട്ടി വാട്ടറിങ്ങനെ സ്റ്റക്കായി കെടക്കുവാ.. അപ്പോ അതു ഫിക്സ്‌ ചെയ്യണ്ടേ? ഡാഡി ഒരു പ്ളമ്പിങ്ങ്‌ അങ്കിളിനെ വിളിച്ചതു ഫിക്സ്‌ ചെയ്യാന്‍ പോയതാട്ടോ.. "

"ബട്ട്‌ ഐ മിസ്സ്‌ മൈ ഡാഡി.. " :(

പെണ്ണിങ്ങനെയാണ്‌, സ്കൂളു വിട്ടു വരുമ്പോ അപ്പന്‍ വീട്ടിലു വേണം. ഒരു 2 മണിക്കൂറൊക്കെ എങ്ങനേം പിടിച്ചുനിക്കും കക്ഷി. "ഐ മിസ്സ്‌ മൈ ഡാഡി, ഐ മിസ്സ്‌ മൈ ഡാഡി" എന്നിങ്ങനെ സുകൃത ജപം ചൊല്ലുന്ന പൊലെ പറഞ്ഞുകൊണ്ടേ നടക്കും.

ഓരോ അഞ്ചു മിനിറ്റിലും ഫോണ്‍ വിളിച്ചു "ഡാഡി എത്താറായോ? എപ്പോ എത്തും, ഇപ്പോ എവിടെ എത്തി" എന്നെല്ലാം തത്സമയ റിപ്പോര്‍ട്ടിങ് നടത്തിക്കൊണ്ടിരിക്കും. ഒരു 6 മണിക്കെങ്കിലും അപ്പന്‍ വീട്ടിലെത്തിയില്ലെങ്കില്‍ പിന്നെ ആകെ മൂഡൌട്ടായി. എവിടെയെങ്കിലും ഒരു മൂലയ്ക്കു ചിണുങ്ങി ഇരിക്കും. ഒന്നിനുമൊരു ഉത്സാഹമില്ലാതെ, ഒരു ചിമിടില്ലാതെ. റ്റി വി കാണണ്ടാ.. ബുക്ക്‌ വായിക്കണ്ടാ.. ആകെ അപ്സെറ്റ്‌..

(ഈ കക്ഷിക്കു തള്ളയെ കണ്ടില്ലെങ്കില്‍ ഒരു പരാതീം ഇല്ല കേട്ടോ. മൂന്നാഴ്ചത്തേയ്ക്കു ഞാന്‍ ഇതിനെ ഇട്ടേച്ചു നാട്ടില്‍ പോയതാ.. :)

"മണി ഒമ്പതായി മക്കളേ.നമുക്കു പോയി കെടക്കാം. "

"ഡാഡി വന്നില്ലല്ലോ.. ഐ ഡോണ്ട്‌ വാണ്ട്‌ റ്റു സ്ളീപ്‌ വിത്തൌട്ട്‌ മൈ ഡാഡി ഹോം".
ഹാന കരച്ചിലിണ്റ്റെ വക്കത്തായി.

"മുത്തേ... ഡാഡിക്കിപ്പോ ഈ രാത്രീലു പ്ളമ്പേഴ്സിനെ ആരേം കിട്ടാഞ്ഞിട്ടല്ലേടാ ? ഇപ്പോ രാത്രി ആയില്ലേ ? എല്ലാരും ചുമ്മ 24 X 7 ന്നൊക്കെ യെല്ലോ പേയ്ജസില്‍ ഇടും..പക്ഷേ വിളിക്കുമ്പോ ആരും വരണില്ല. അതല്ലേ ഡാഡിക്കു വരാന്‍ പറ്റാത്തേ ? "

"വൈ ഡോണ്ട്‌ ഡാഡി ഡൂ ഇറ്റ്‌ റ്റുമോറോ മോണിങ്ങ്‌ ? "

"അപ്പോ നമുക്കു രാവിലെ നമ്മുടെ എമ്പ്ളോയീസും കസ്റ്റമേഴ്സും വരണതിനു മുന്‍പ്‌ എല്ലാം ഫിക്സ്‌ ചെയ്യണ്ടേ? മോളെ.. കണ്ണടച്ച്‌ ഈശോയോടു പ്രാര്‍ത്ഥിച്ചു കെടന്നോ. ഈശോയേ... എന്റെ ഡാഡിക്കു വേഗം പ്രോബ്ളെം ഫിക്സ്‌ ചെയ്യാന്‍ പറ്റണേന്ന്"

"വൈ വൈ വൈ ഷുഡ്‌ ഐ പ്രേ ?"

"എന്റെ മുത്തിനു നല്ല എജൂക്കേഷന്‍ തരണ്ടേ? നല്ല സ്കൂളിലു പഠിക്കണ്ടേ? പിന്നെ എന്തോരും ബുക്സാ നമ്മളു മേടിക്കണേ ഹാനക്കുട്ടിക്ക്‌? അതിനൊക്കെ പൈസ വേണ്ടേടാ ? അപ്പൊ നമ്മുടെ ബിസിനസെല്ലാം നന്നായി പോയാലല്ലേ ശരിയാവുള്ളൂ ?"

"പഷേ, എനിക്ക്‌ ഡാഡീടെ പൈസ വേണ്ടാല്ലോ. ഐ ഹാവ്‌ ലോട്ട്‌ ഓഫ്‌ മണി ഇന്‍ മൈ കോയിന്‍ ബോക്സ്‌" !!!

പൈസയുടെ വെലയൊക്കെ മനസ്സിലാക്കിക്കോട്ടേ, സമ്പാദ്യ ശീലമുണ്ടാവട്ടെയെന്നൊക്കെ വിചാരിച്ചു കോയിന്‍ ഇടാന്‍ വേണ്ടി ഒരു ഡപ്പി കൊടുത്തതാ. അതിന്റെ മുക്കാലും കക്ഷി കോയിന്‍ ഇട്ടു നെറച്ചിട്ടുണ്ട്‌. അതു മുഴോനും ചേര്‍ത്താലും,മുക്കാല്‍ ചക്രത്തിണ്റ്റെ വെല ഇല്ലാന്നും, പിച്ചച്ചട്ടി മേടിക്കാന്‍ പോലും തെകയൂല്ലെന്നും, ഞാനിതിനെ എങ്ങനെ പറഞ്ഞു മനസ്സിലാക്കാനാണെണ്റ്റെ ഒടേതമ്പുരാനേ...