ചോദിച്ചു ചോദിച്ചു പോകുമ്പോള്‍

" ഗായ്സ്... ആര് യൂ ഗായ്സ് നോട്ട് ഗോയിങ്ങ് റ്റു ഓഫീസ് റ്റുഡേ ? "

" ഇല്ല മുത്തേ ... ഇന്നു സാറ്റര്‍ഡേ അല്ലേ ? സാറ്റര്‍ഡേ ഓഫീസ് ഇല്ലല്ലോ.."

" വാട്ടീസേ സാറ്റര്‍ഡേ " ?

" സാറ്റര്‍ഡേ ന്നു വച്ചാല്‍ സെവന്‍ ഡേയ്സില്‍ ഒരെണ്ണം.. "

"വാട്ടീസേ ഡേ ? "

" ഡേ ന്നു പറഞ്ഞാല്‍.. ഒരു ദിവസം നമ്മള്‍ മോണിങ്ങെഴുന്നേറ്റ് ബ്രഷ് ചെയ്യില്ലേ.. ? അപ്പൊളാ ഒരു ഡേ തുടങ്ങുന്നേ.... പിന്നെ ബ്റേയ്ക്ഫാസ്റ്റ് കഴിക്കും... സ്കൂളിലു പോകും... തിരിച്ചു വന്നു ലഞ്ചു കഴിക്കും..നാപ്പെടുക്കും.. കളിക്കും.. പിന്നെ കുളിച്ച് ഡിന്നറ് കഴിച്ചുറങ്ങും... അത്രേമൊരു ഡേ ... പിന്നെ ഹാന മോളു വേയ്ക്കപ്പ് ചെയ്യുമ്പോ അതു നെക്സ്റ്റ് ഡേ .

" വാട്ടീസേ നെക്സ്റ്റ് ഡേ " ?

"ശെടാ... ഇതു വല്യ തൊന്തരവായല്ലോ.. ഈ പെങ്കൊച്ചിനെക്കൊണ്ട്.." (ആത്മഗതം)"

" അതു മോളേ.. ഒരു ഡേ കഴിഞ്ഞു പിന്നെ വരുന്ന ഡേ യില്ലേ.. അതാ നെക്സ്റ്റ് ഡേ.. അങ്ങനെ സെവന്‍ ഡേയ്സ് കൂടുമ്പൊളാ ഒരു വീക്ക് ആവണത്.... "

" വീക്ക്... ??? വാട്ടീസേ വീക്ക് " ?

" നല്ല വീക്കു ഞാന്‍ വച്ചു തരും കേട്ടോ... മിണ്ടാതെ പോടീ പെണ്ണേ... " (ഇതും ആത്മഗതം)

" വീക്കെന്നു പറഞ്ഞാല്...നമ്മുടെ സണ്ഡേ..മണ്ഡേ.... പിന്നേ... പിന്നെ ഏതൊക്കെയാ... ? ഹാന തന്നെ പറഞ്ഞേ.."..

" റ്റ്യൂസ്ഡേ..... തേഴ്സ്ഡേ...ഫ്രൈഡേ... സാറ്റര്‍ഡേ....."

ഹാവൂ.. സമാധാനം... തല്ക്കാലം ചോദ്യങ്ങളില്‍ ന്നു രക്ഷപ്പെട്ടു...

ഈ ദിവസങ്ങളില് വീട്ടില്‍ സ്ഥിരം നടക്കുന്ന കലാപരിപാടികളില്‍ ഒന്നാണിത്.. യെന്തെങ്കിലുമൊരു വാക്കു കേട്ടാല്‍... അതില്പ്പിടിച്ചു തൂങ്ങിക്കളയും ഹാന.. ഒന്നിനു പുറകേ ഒന്നായി പിന്നങ്ങോട്ടു ചോദ്യങ്ങള്‍ തന്നെ...
ഉത്തരം പറയാതെ പിന്നെ സ്വൈരം തരില്ല പെണ്ണ്...അറിയില്ലാത്ത കാര്യങ്ങളേ ചോദിക്കൂ എന്നൊന്നും വാശിയില്ല ഹാന്യ്ക്ക്... അറിയാവുന്നതാണെങ്കിലും വെര്തെ ചോദിച്ചോണ്ടിരിക്കും...


" മോളേ.. ബെഡ്റൂമിള്‍ പോയി നമ്മടെ ഹാരിമോന്റെ ഒരുടുപ്പിങ്ങെടുത്തോണ്ടു വന്നേ .."

" ബെഡ്റൂം ??? വാട്ടീസേ ബെട്റൂം " ? (ബെഡ്‌റൂമെന്നാദ്യമായി കേട്ട മാതിരി )..

" ബെഡ് ഇട്ടിരിക്കണ റൂം അല്ലേടി കള്ളിപ്പെണ്ണേ ബെട്റൂം " ?

" വാട്ടീസേ ബെഡ് "?

" ബെഡ്.......മ്മ്ഹ്. നമ്മളു സ്ലീപ് ചെയ്യണതെവിടെയാ.. അതല്ലേ ബെഡ് "

" വാട്ടീസ് സ്ലീപ് " ?

" സ്ലീപ്പെന്നു പറഞ്ഞാല്‍... നമ്മളു കണ്ണൊക്കെ അടച്ചു റെസ്റ്റ് ചെയ്യുന്നതല്ലേ സ്ലീപ് ?

" റെസ്റ്റ്..? വാട്ട് യൂ റ്റോക്കിങ്ങ് എബൗട്ട് " ?

തീരെ പരിചയമില്ലാത്ത വാക്കുള്‍ കേള്‍ക്കുമ്പോ... അല്ലെങ്കില്‍ ഒന്നും മനസ്സിലാവാത്തപ്പോ ഹാന പറയുന്ന ഡയലോഗാണീ 'വാട്ട് യൂ റ്റോക്കിങ്ങ് എബൗട്ട് ' ?

"റെസ്റ്റെന്നു വച്ചാല്‍..നമ്മളു റ്റയേഡാവുമ്പോ... ചുമ്മാ കെടക്കൂല്ലേ... ഒന്നും ചെയ്യാതെ... "

ഹൗ രക്ഷപ്പെട്ടു.... ഇക്കുറി ഹാനയ്ക്കു പുതിയ വാക്കൊന്നും കിട്ടിയ ലക്ഷണമില്ല... തല്ക്കാലം രക്ഷപ്പെട്ടു..


"പപ്പാ.. വെയര്‍ ആര്‍ യൂ ഗോയിങ്ങ് ? "

" പപ്പാ... ന്യൂ ജേഴ്സിക്കു പോവാ മോനേ.."

"ന്യൂ ജേഴ്സി. !! വാട്ടീസ് ദാറ്റ് " ?

" ന്യൂ ജേഴ്സി ഒരു സ്റ്റേയ്റ്റാടാ... "

" സ്റ്റേയ്റ്റ് ?.. വാട്ടീസേ സ്റ്റേയ്റ്റ് ?"

" സ്റ്റേയ്റ്റെന്നു പറഞ്ഞാല്‍.., പെന്സില്വേനിയ ഒരു സ്റ്റേയ്റ്റല്ലേ ? അതു പോലെ വേറെ ഒരു സ്റ്റേയ്റ്റാണ് ന്യൂ ജേഴ്സി ".

" പെന്സില്വേനി... വാട്ടീസ് ദാറ്റ് " ?

" പെന്സില്വേനിയ... നമ്മളു താമസിക്കുന്ന സ്റ്റേയ്റ്റാടാ.. നമ്മുടെ ഹോമും നമ്മുടെ സ്കൂളും ..പിന്നെ.. ചര്‍ച്ചും.. പിന്നെ വാള്‍ഗ്രീന്‍സും... പിന്നെ വേറെ ഷോപ്പും... അങ്ങനെ അങ്ങനെ കൊറെ സ്ഥലം കൂടുമ്പൊളാ പെന്സില്വേനിയാ സ്റ്റേയ്റ്റ്. അങ്ങനെ ഫിഫ്റ്റി സ്റ്റേയ്റ്റ്സ് ആണു യുണൈറ്റഡ് സ്റ്റേയ്റ്റ്സില്‍.."

" യുണൈറ്റഡ് സ്റ്റേയ്റ്റ്സ്... ഗ്ലോബ്... " ?????

യുണൈറ്റഡ് സ്റ്റെയ്റ്റസെന്നു കേട്ടതേ, ഗ്ലോബിലുള്ള ഒരു സ്ഥലമാണെന്നു ഹാനയ്ക്കു മനസ്സിലായി...
തല്ക്കാലത്തേയ്ക്കു ശ്രദ്ധ അതിലേയ്ക്കായി....ഹാവൂ.... എന്നൊന്നു ആശ്വസിച്ചതും....

'മമ്മാ..., വെയറീസ് ചൈനാ ഗോണ് ? ഐ ക്യനോട്ട് ഫൈന്ഡ് ചൈന എനി മോര്... ക്യന്യൂ പ്ലീസ് ഹെല്പ് മീ .."

യെന്റമ്മേ... തോറ്റു ഈ പെണ്ണിനെ കൊണ്ട്....

ചോദ്യങ്ങള് അവസാനിക്കുന്നില്ല... ഒന്നിനു പിന്നാലെ ഒന്നായി.. ചോദിച്ചു കൊണ്ടേയിരിക്കുകയാണു ഹാന...

വാല്‍ക്കഷണം :ഞാന്‍: " ഹോ...ഉഗ്രന്‍ മീങ്കറിയാരുന്നു... ഞാന്‍ ഒരു കണക്കില്ലാതെ കഴിച്ചു...നോക്ക്... എന്റെ വയറു നെറഞ്ഞു പൊട്ടി..." .

കേട്ടു നിന്ന ഹാന : "എന്താ മമ്മാ.... വാട്ട് ഹാപ്പന്ഡ് ? ഡിഡ് യൂ ബ്രോക്ക് യുവര്‍ ടമ്മി. ? " " എന്താ മമ്മാ കെയര്‍ഫുള്‍ ആവാത്തേ ? അതല്ലേ പൊട്ടിപ്പോയത് ? സാരല്ല മമ്മാ.. നെക്സ്റ്റ് റ്റൈം കെയര്‍ഫുള്‍ ആവണോട്ടോ "

ഹാന ബൗളുകളും മറ്റും താഴെ ഇട്ടു പൊട്ടിക്കുമ്പോള്‍ ഞാന്‍ പറയുന്ന അതേ ഡയലോഗ്... അതേ ശൈലിയില്‍ തിരിച്ചടിക്കുന്നു മകള്‍!!!

ഐ ഡു നോട്ട് മമ്മേടേ ചക്കരമുത്ത്

ഹാനയുടെ ജീവിതത്തിലിപ്പോള്‍ ‘ഐ ഡു നോട്ടി’ന്റെ സീസണാണ്. എന്തു പറഞ്ഞാലും ഹാനയുടെ മറുപടി ആരംഭിക്കുന്നതൊരു ‘ഐ ഡു നോട്ടി‘ലായിരിക്കും.

"മോളേ, എന്താ ഇതുവരെ ബ്രഷ് ചെയ്യാത്തേ..? ബ്രഷ് ചെയ്യാന്‍ വന്നേ”

“ഐ ഡു നോട്ട് വാണ്ട് റ്റു ബ്രഷ് മൈ റ്റീത്ത്”

“ഹാനാ, ഗ്രേയ്പ്സ് എടുക്കട്ടേടാ കഴിക്കാന്‍” ?

“ ഐ ഡു നോട്ട് ലൈക് ഗ്രേയ്പ്സ്”

"ഹാനാ, രാത്രി ആയല്ലോ, ഇനി റ്റോയ്സും ബുക്സും ഒക്കെ പെറുക്കി വച്ചേ”

“ ഐ ഡു നോട്ട് വാണ്ട് റ്റു ടൂ ക്ലീനപ്പ് “

‘കുരയ്ക്കുന്ന പട്ടി കടിയ്ക്കില്ലാ’ന്നു പറയുന്ന പോലെ, വെര്‍തെ ഈ പറച്ചിലു മാത്രമേയുള്ളൂ.. ബുക്സൊക്കെ അടുക്കി ഷെല്‍ഫില്‍ വച്ചു കൊണ്ടാവും മിക്കവാറും ഈ വീരസ്യം പറച്ചില്‍.

“നല്ല കുട്ടികള്‍ റ്റോയ് ഷെയറു ചെയ്യണംന്നു പറഞ്ഞിട്ടില്ലേ ? മ്മടെ ഹാരിമോനല്ലേടാ, അവനു കൊടുത്തേ അതു കുറച്ചു നേരം”

“ഐ ഡു നോട്ട് ഷെയര്‍ റ്റോയ്സ് വിത്ത് ഹാരിക്കുട്ടന്‍” എന്നു പറഞ്ഞുകൊണ്ടു “ചേച്ചീടെ കുട്ടോ.. ഇന്നാ മോനേ. ചേച്ചി ഷെയറു ചെയ്യുവാട്ടോ” എന്നു പറഞ്ഞ് ഹാരിക്കു കൊടുക്കുവേം ചെയ്യും.

“ ഇതിത്ര നേരമായിട്ടും കഴിച്ചു തീര്‍ത്തില്ലേ, അമ്മ കോരിത്തരട്ടേ “ ?

“ ഐ ഡു നോട്ട് ലൈക് മമ്മാ കോരീത്തരാ “ , എന്നു പറഞ്ഞിട്ടു 2 മിനിറ്റിനകം, “ഒന്നു കോരിത്തരോ,മമ്മാ” എന്നു ചോദിക്കും.

മുറി ഇംഗ്ലീഷും മുറി മലയാളവും വച്ചുള്ള ഈ നിഷേധത്തരം പറച്ചില്‍, ആദ്യമൊക്കെ ഇത്തിരി സങ്കടപ്പെടുത്തിയെങ്കിലും, ഇപ്പോ ഇതൊരു കോമഡിയാണു വീട്ടില്‍.

“ഇത്രേമടുത്തിരുന്നാണോ റ്റി വി കാണാന്‍ ഹാനക്കുട്ടിയോടു പറഞ്ഞിരിക്കണത് ? പപ്പാ ഓഫ് ചെയ്യാന്‍ പോവാട്ടോ. ചെയറില്‍ പോയിരുന്നേ “.
“ഐ ഡു നോട്ട് സിറ്റ് ഓണ്‍ ചെയര്‍”

പണ്ടൊക്കെ ആയിരുന്നെങ്കില്‍, “അയ്യോ ന്റെ കുഞ്ഞു കൈവിട്ടു പോയേ” എന്നു ഞാന്‍ ചങ്കിനിട്ടിടിച്ചു നിലവിളിച്ചേനേ. “ഇവളുടെ ഈ പന്ന സ്വഭാവം ഒന്നു മാറ്റിത്തന്നാല്‍ മലയാറ്റൂര്‍ മല കേറിയേക്കാമേ” എന്നു തോമാസ്ലീഹായെ സോപ്പിട്ടേനേ. പണ്ടു ഹാന ഇതുപോലെ, “ഹാനാ . അടി അടി.. ” എന്നു നമ്മള്‍ പറഞു തീരുന്നതിനു മുന്‍പൊരെണ്ണം നമുക്കിട്ടു പൊട്ടിച്ചിരുന്ന സമയത്തും, പിന്നെ ഓടിനടന്നെല്ലാവരേം കടിച്ച കാലത്തും ഞാനെത്രയോ വട്ടം നോവേനയെത്തിച്ചു. റ്റോയ്‌ലറ്റ് സീറ്റിലിരിക്കാന്‍ മടി കാണിച്ചു കരഞ്ഞപ്പോഴും, മുടി കെട്ടാന്‍ വിളിക്കുമ്പോള്‍ സാംസണെ പോലെ മുടിയിലാണവളുടെ ജീവനെന്ന മാതിരി കാറിപ്പൊളിച്ചിരുന്ന കാലത്തും, ചുമ്മാ പതം പറഞ്ഞു കരഞ്ഞ പൊട്ടത്തിയാണു ഞാന്‍.

ഇന്നു പക്ഷേ എനിക്കറിയാം, ഒക്കെ വളര്‍ച്ചയുടെ ഓരോരോ ഘട്ടങ്ങളാണ്. ഒക്കെ കഴിഞ്ഞല്ലേ നമ്മളും വന്നത് ? ഒരു മൂവി, “ഇന്നിത്രയും കണ്ടാല്‍ മതി, നാളെ ബാക്കി കാണാം”, എന്നെങ്ങാന്‍ പറഞ്ഞോഫ് ചെയ്താല്‍, അന്നു മുഴുവന്‍ കരഞ്ഞിട്ടുണ്ടു ഞാന്‍. ഇന്നിപ്പോ, വെര്‍തെ എത്ര മൂവി ഇരുന്നാലും കാണാനേ തോന്നാറില്ല.

“ഹാനാ, ഗുഡ് ഗേള്‍സിങ്ങനെ പറയൂല്ലാട്ടോ. ഹാനക്കു നല്ല കുട്ടിയാവണ്ടേ ? അപ്പോ പപ്പയോടും മമ്മയോടും, ഐ ഡു നോട്ടെന്നു പറയരുതുട്ടോ “ എന്നു പറഞ്ഞു കൊടുക്കുമ്പോള്‍ “ഐ ഡു നോട്ട് വാണ്ട് റ്റു ഗുഡ് ഗേള്‍” എന്നു ഹാന തിരിച്ചടിക്കും.

പക്ഷേ, എനിക്കുറപ്പുണ്ട്, 3 മാസം കഴിഞ്ഞീ പോസ്റ്റെടുത്തു വായിക്കുമ്പോള്‍, ഞാന്‍ തന്നെ ഓര്‍ക്കും..”ഹൌ..ഇങ്ങനൊരു കുറുമ്പും ഉണ്ടാരുന്നല്ലോ, എന്റെ കള്ളിപ്പെണ്ണിനെന്ന്.

ഹാനേടെ ഐ ഡു നോട്ട് രാക്ഷസന്‍ ഈ കുടത്തില്‍ നിന്നു കൂടെക്കൂടിയതാണെന്നാ പപ്പാടെ കണ്ടുപിടുത്തം. ശരിയാകാനാണു സാധ്യത. ഒന്നൊന്നര മാസം മുന്‍പു ദിവസം അഞ്ചു പ്രാവശ്യമെങ്കിലും സുകൃതജപം മാതിരി, ആ ബുക്കു വായിപ്പിക്കുമായിരുന്നു. എന്തായാലും, അതിനവസാനം ഡുനോട്ട് ലൈക്ക് എല്ലാം ഐ ഡു ലൈക്ക് ആയിമാറുന്നുണ്ട്.

“അയ്യേ, ഇതെന്താ പാന്റി മാത്രമിട്ടു നടക്കുന്നേ ? ഷേയ്മാവില്ലേ ഹാനയ്ക്ക് ? ഉടുപ്പെടുത്തിട്ടേ”

“ഐ ഡു നോട്ട് ലൈക്ക് ഉടുപ്പ്”

“തന്നെ ഉടുപ്പെടുത്തിട്ടാലേ..... പപ്പ ആന്‍‌ഡ് മമ്മ വില്‍ ബി പ്രൌഡ് ഓഫ് ഹാനക്കുട്ടി. നോക്കട്ടെ , തന്നെ ഇടാന്‍ പഠിച്ചോന്ന്..”

“ ഐ ഡു നോട്ട് വാണ്ട് പപ്പാ ആന്‍‌ഡ് മമ്മാ പ്രൌഡ് ”

“മമ്മേടേ ചക്കരമുത്തല്ലേടാ, ഒന്നെടുത്തിട്ടേടാ.”

“ഐ ഡു നോട്ട് മമ്മേടേ ചക്കരമുത്ത് ....” :)